Meghalaya : Jaintia ṭawng official language status pek phut

Meghalaya sorkarin Khasi, Garo leh English official language status a pek hnuah, Jaintia Hills-a tualchhung pawlte chuan state sorkar chu Jaintia ṭawng bakah A-B Jaintia (Onar) phonetic script chu official language status pek an phut.

Jaintia National Council (JNC) leh Jaintia Students' Union (JSU) chuan thuchhuah inṭawm siamin, Meghalaya State Language Act hnuaiah Jaintia ṭawng leh A-B Jaintia phonetic script chu official language-a pawm an phut a ni. He thutlukna hi Jowai-a zirna lama mithiam, thuziaktu, zirtirtu, professor, ziak leh chhiar lama mi thiam, kum upate leh pawl pahnih aiawhten meeting an neih zawhah siam a ni. Sawi hona an neihah Jaintia ṭawng humhalh leh mumal taka official language-a pawmte a tel.

Meeting zawha thu a sawiah, JNC president Sambormi Lyngdoh chuan meeting-a telte chuan Jantia ṭawng leh phonetic system official language status pek a nih theihna turin hmalak an rel tih a sawi. A-B Jaintia script hi Jaintia Hills Autonomous District Council chuan kum 2021 budget session-ah resolution hmangin pawm a lo ni tawh a, hemi hnuah Meghalaya Gazette-ah hriattir a ni.