Arunachal: Christian Forum-in APFRA chungchangah ni 15 chhung sorkar hun pe

Arunachal Christian Forum (ACF) chuan, state sorkar chu Arunachal Pradesh Freedom of Religion Act (APFRA), 1978 hnuaia dan siam leh kalpui tura ruahmanna a siam chu titawp tura phutin, an lungawi lohna leh an thil phut ngaihthah a nih chuan state pumah lungawi lohna lantir an tum a, chung zingah chuan kawng zawh leh bandh huaihawtte pawh a tel. An pawl chuan an thil phut chungchanga chhanna pe turin sorkar chu ni 15 chhung hun an pe a ni.

Chief minister Pema Khandu hnena memorandum an thehluhah, ACF chuan sorkarin kum 10 liam taa dan siam tawh, dan thar an siam hmanga kalpui a nih theihna tura hmalakna chu an dodal tih an tarlang. Forum chuan he dan hi hman a nih chuan Kristiante dikna chanvo, sakhaw zalenna, khawtlang inremna leh state-a community hrang hrang inkara remna leh muanna nasa takin a nghawng thei tih an sawi.

Memorandum-ah chuan tun hnaia High-Powered Committee (HPC) hmalakna hmanga APFRA-1978 kaihhnawih endikna neih tura din a ni chuan mipui tam tak zingah lungawi lohna a thlen tih tarlan a ni. ACF chuan sakhaw pawl, civil society pawl leh mipuiten hemi chungchanga lungawi lohna an thlen fo chung pawhin, state sorkar chuan stakeholder-te nen inrawnkhawmna mumal awm loin he dan hi kalpui tum a ni tih an sawi bawk. Sakhaw zalenna tichhe thei leh, khawtlanga buaina thlen thei kawnga hma lak a nih dawn chuan inbiakna mumal neih a pawimawh tih an tarlang.

Forum chuan sorkar chu hun tiam an pek chhunga chhanna an pe lo a nih chuan state pumah lungawi lohna lantir an tum tih an tarlang. ACF chuan he an hmalakna hi Kristian community-te dikna chanvo venhimna leh state-a remna leh muanna humhimna a nih thu an sawi.