Assam : CM leh Union Education Minister inbia

Assam chief minister Himanta Biswa Sarma chu New Delhi-ah Thawhlehni khan union education minister, Dharmendra Pradhan nen inbiain, Guwahati-a Indian Institute of Management (IIM) permanent campus sak tura rawtna kalpui mek dan an sawi dun. Meeting hi Pradhan-a chenna inah neih a ni.

CM Sarma chuan an state-in premier educational institution leh, world-class academic infrastructure din turin hmalakna ngelnghet tak a nei tih a social media-ah a tarlang. Assam chu India ram hmarchhaka education hub din thei turin zirna in ṭha din kawngah hma a la mek tih a sawi bawk. Union Education Minister nen inbiakna hlawkthlak tak an neih thu leh, Assam-a zirna infrastructure thuam chakna turin thlawpna a pe chhunzawm zel a ni, a ti.

Pradhan pawhin Guwahati-a IIM din tur chu zirna, research leh thil thar hmuh chhuahna atan a pawimawh hle dawn tih a social media-ah a tarlang bawk. Zirna in chuan hmarchhak bialah talent tihhmasawn, thiamna tihpun leh inkaihhruaina kawngah hun remchang a siam dawn tih a tarlang bawk. IIM Guwahati hi Indian Institute of Management Shillong dawta hmarchhak biala Indian Institute of Management pahnihna tur a ni. Sarma chuan academic activity chu transit campus-ah neih ṭan a nih dawn thu leh, permanent campus chu Kamrup district-a Palasbar bula Marabhita-ah din a ni dawn tih a sawi.