Amit Shah-a'n Tripura tlawh dawn

Union home minister Amit Shah chuan vawiin June 4 leh 5 hian Tripura a tlawh dawn a, Taj Pushpabanta Palace hotel sakna tur lungphum a phum dawn bakah, Bangladesh frontier-a ramri hungna a endik dawn tih chief minister Manik Saha chuan a sawi. Shah hian Meghalaya khawpui Shillong-a North Eastern Council (NEC) plenary session-a a tel zawhah Tripura a pan dawn a ni.

Union Home Minister hian June 5-ah Taj Pushpabanta Palace hotel sakna tur lungphum a phum dawn a, he project hi Tripura sorkarin Indian Hotels Company Ltd (IHCL) nen memorandum an ziah hmanga thawh tur a ni. Nikum March thla khan Pushpabanta Palace chu heritage five-star-a thlak turin thutlukna siam a lo ni tawh a ni. Palace hi kum 1917-a Maharaja Birendra Kishore Manikya sak a ni a, hemi hnuah kum eng emaw zat chhung Governor House atan hman leh niin, Tripura-a heritage structure ngaihhlut hlawh tak a ni.

Shah hian West Tripura leh Sepahijala district-a India-Bangladesh ramri hungna dinhmun a endik bawk dawn a ni. Ruahsur nasa in ramri hungna a tihchhiat nasat avangin state sorkar chuan sorkar laipui chu siamṭhat hna thawhna kawngah hmalak sak turin a lo ngen tawh bawk. Shah-a'n ramri hungna a endik zawhah hmalak dan turah thutlukna a siam bawk ang. Chief minister Manik Saha chuan West Bengal, Assam leh Tripura-a ramri enkawlna tihchakna turin ruahmanna a siam dawn tih a sawi bawk.