NH dan chah hi dan kalh a ni : MHA

Ministry of Home Affairs chuan Thawhṭanni khan thuchhuah siamin, Manipur-a Naga pawlten National Highway an dang chat chu dan kalh a ni, a ti.

Home Ministry chuan NH 2 leh 37-te dan chah a nih avanga mipuite chunga harsatna thleng mek chu pawi a tih thu sawiin, harsatna sutkian a nih theih nan leh, boruak muanawm tak a awm leh theihna turin United Naga Council (UNC)-te chu kawngpui dan titawp turin a phut tih a tarlang. India ramah dan a lal ber tih tarlangin, mipuite harsatna siam zawnga kawngpui dan chah chu dan kalh a ni, a ti. Mimal emaw pawl emaw kutah dan chu pek theih a ni lo tih ministry chuan a sawi.

State sorkar chu boruak muanawm tak a awm theih nan leh, nitin mahmawh lakna kawnga harsatna thleng mek sukiang tura hma la turin Ministry of Home Affairs chuan a hriattir. Kawng laka bungraw phur lirthei tangkhang mek te hruai chhuak tur leh, oil-a harsatna nasa tak thleng mek chingfel thuai tura hma la turin a ngen bawk. Hei bakah hian dan hnuaiah mipuite thlamuang taka a an awm theihna turin, United Naga Council chu kawngpui dan titawp thuai turin a hriattir bawk.

Hun rei tak chhung Manipur-a National Highway dan chah a nih vang hian, sorkar laipui chuan hemi titawp tur hian central security force, company 15 tirh belh a nih tur thu, Thawhṭannni khan a puang. Ministry of Home Affairs chuan central force tirh belh a nih tur thu hi a puang a, mamawh dan a zirin tirh belh leh a nih tur thu a tarlang bawk. Hmarchhak hmun hrang hrangah dan leh thupek khauh zawka kenkawh an nih theihna turin sorkar laipui chuan hma a la mek zel tih sawiin, dan leh thupek chu mimal leh pawl anga palzut a remti lo tih Home Ministry chuan a tarlang.

Hetih lai hian UNC-te chuan cabinet meeting-in district thar pasarih dinbelh a remtih leh tak avangin, nasa zawka hmalak an tum thu an sawi. Hma lak zel dan tur ngaihtuahin Thawhṭanni khan meeting an nei a, Naga pawl hrang hrangte chuan UNC-te hmalakna an thlawp tlat tur thu an puang. Hei bakah hian UNC president leh information secretary-te chu chhuah turin an phut a, engti zawng mahnin an ram chu chhuh luih an remti ngai dawn lo niin an sawi bawk.

Meeting chuan thuchhuah siamin, President Rule puan an phut tih an sawi a, UNC Vice President, General Secretary, Chandel Naga People’s Organisation (CNPO) president, Naga People’s Organisation (NPO) president, Tangkhul Naga Long president, Zeliangrong Baudi chairman, Naga Women’s Union presi-dent, All Naga Students’ Association Manipur (ANSAM) president leh Naga People’s Movement for Human Rights (NPMHR) aiawhten hming an ziah hnan a ni.