PRJA-te'n district thar din thlawp

Manipur 'Iron Lady' Irom Sharmila Chanu-i party din, People’s Resurgence and Justice Alliance (PRJA) chuan Manipur cabinet-in district thar pasarih din tura thutlukna a siam chu an thlawp tih a sawi.

PRJA thuchhuah chuan, Chief Minister Okram Ibobi Singh-a kaihhruai cabinet meeting-in district thar din a remti chu an thlawp tih an sawi. Hetih lai hian state assembly election hmachhawn mai tur an nih avangin, an thutlukna siam chungchangah nghet taka an din a ngai a, mawhphurhna an lak ngam a ngai a ni, an ti. Kangpokpi, Jiribam, Noney, Kamjong, Pherzawl, Tengnoupal leh Kakching-te chu district-ah puan thuai a nih an beisei thu an tarlang bawk. Sharmila-i party din thar PRJA hian Manipur assembly election-ah candidtate 20 thehchhuah an tum a, tunah hian Manipur University-ah campaign-cum-discussion session an kalpui mek a ni.

Manipur CM Okram Ibobi Singh chuan, district thar din tura thuthlukna siam chu politics hamṭhatna zawn vanga a nih loh thu a sawi. Politics-a hamṭhatna duh vanga district thar din anga sawi chu inpuhmawhna mai a nih thu sawiin, hmasawnna hna chak zawka thawh a nih theih nan ti an nih thu a sawi. Ibobi chuan cabinet meeting-in ngun taka a ngaihtuah hnuah thutlukna siam a ni tiin, sorkar hmalakna thlawp zawk turin mipuite a chah.

CM chuan an chakkhai lamna kawngpui pawimawh hun rei tak chhung dan a nih chungchang sawi chhuakin, United Naga Council-te hmalakna chu Naga hel, National Socialist Council of Nagaland - Isak-Muivah (NSCN-IM)-te'n an thlawp avangin hmalak a harsat thu a sawi. National highway dan chu dan kalh a ni thu sawiin, hemi chungchangah hian union home minister Rajnath Singh pawh an dawr tawh tih a sawi. Harsatna an tawh mek sukiang tuin sorkar chuan hma a la mek a, UNC-te'n kawngpui an dan chah mek tihtawp a nih theih nan state sorkar chuan Sadar Hills chu district-ah a hlangkai dawn lo tih a puang bawk. Hetih lai hian a tira telh zinga mi, Jiribam chu district thar tura puan zingah hian telh chhunzawm a ni.