Tripura sorkarin kum thar aṭangin Online system hmang ṭan dawn

Tripura sorkar chuan kum 2017 January aṭangin sorkar sum che vel zawng zawng chu online system-a kalpui a nih tur thu a puang.

Chief Secretary Yashpal Singh chuan, sorkar sum che vel online system-a kalpui vek tur hian sorkar chuan ruahmanna a siam tawh a, nakkum January thla aṭangin a taka hman ṭan a ni ang, a ti. Hemi chungchangah hian sate mipuite chu bank account nei vek turin state sorkar chuan a hriattir tawh a ni tiin, Tripura mipui 80% zet chuan bank account an neih tawh thu a sawi. Online system kalpui tur hian Union Cabinet Secretary PK Sinha chuan state sorkarah ngenna a thlen bawhzuiin hmalakna kalpui a nih thu, Chief Secretary chuan a sawi bawk.

Yashpal Singh chuan, tea garden leh brick kiln worker-te chu bank account neih vek tur hriattir an ni tawh tih sawiin, hun eng emaw chen aṭangin heng hnathawktute hlawh chu bank kaltlanga pek a ni, a ti. Tripura-ah hian tea garden 58-ah hnathawktu mi 15,000 vel zet an awm. State sorkar hmalakna bawhzui hian State Bank of India chuan hmun hrang hrangah mobile camp a buatsaih mek a, online system hi a taka kalpui a nih hun chuan awlsam zawk leh fel fai zawkin sum khawih chet a ni tawh dawn tih Yashpal Singh chuan a sawi bawk.