Assam : Cachar-a ruihhlo do beihpui thlak naah ruihhlo ṭhahnem tak man

Assam-a Cachar police-ten district hmun hrang hranga ruihhlo do beihpui an thlak naah, heroin, codeine khuh damdawi leh tramadol tablet ṭhahnam tak an man a, ruihhlo tawlhrutu leh a zuartu mi eng emaw zat an man bawk. Udharbond Police Station-a police-ten an thudawn bawhzuia beihpui an thlak naah, Intra B-10 truck, registration no. AS11DC-8629 an dap naah, officer-te chuan codeine syrup bur 8,010 leh tramadol tablet packet 150 an man a, packet khatah hian strip 10 zel a awm a ni.

He truck khalhtu Gyas Uddin Lasker, Udharbond Police Station hnuai Durhanagar Part-V a cheng chu man nghal a ni. Kalain Police Station hnuaia beihpui thlakna dang an neihah, truck registration no. AS01EC-2533 chu Digorkhal-ah tih din niin, police-te chuan he truck an dap naah hian sahbawn bawm 14-a heroin an dah gram 170 an man bawk. Hemi kaihhnawihah hian Natanpur-a cheng Azaduddin chu an man.

Silchar Police Station hnuai Fatok Bazar bulah ruihhlo zuar, Ajim Uddin Laskar pawh man niin, a kut aṭang hian heroin nia rinhlelh gram 1.7 an man bawk. Hei bakah Silchar rel station bula beihpui thlakna an neihah, hmeichhe ruihhlo zuar Gul Nihar Begum Laskar pawh man niin, a kut aṭangin sahbawm bawm 15-a heroin dah, gram 298 man sak a ni bawk. Sonai Police Station hnuaia beihpui thlakna dang lehah, Rashmina Begum (31) leh Mamataz Begum Choudhury (37), Makhan Nagar Bosti-a chengte pawh man niin, an kut aṭangin sahbawn bawm 11 a heroin gram 122 an man bawk. Police-te chuan an mi mante chu custody-a hruai an nih thu leh, Narcotic Drugs and Psychotropic Substances (NDPS) Act hnuaiah hremna pek an ni dawn tih an sawi.