Manipur-in ILP web portal hmang ṭan

Manipur chief minister N Biren Singh chuan Ningani khan an state-a Inner Line Permit (ILP) online hmanga dil theihna tur, www.manipurilponline.com chu tlangzarhin, Zirtawpni aṭang khan hman ṭan nghal a ni. . 

ILP web portal hmangin he system hi changtlung leh rintlak zawkin, maintenance record leh data te ṭha takin a dahṭhat theih dawn a ni. Portal-ah hian ILP pek a nih dan kimchangte pawh dah tel vek a ni ang. 

CM Singh chuan online portal hi Bir Tikendrajit International Airport-ah hman hmasak a ni dawn tih sawiin, reiloteah entry point hrang hrangah pawh hman chhoh a nih tur thu a sawi. Mobile app pawh siam thuai tum a ni tih a sawi bawk. 

Manipur-ah hian January 1aṭang khan ILP system hi hman ṭan a ni a, ILP entry point hi pasarih, Imphal Airport, Sena­pati-a Moa, Jiribam, Ukhrul-a Jessami, Tengnoupal-a Moreh, Chura­chandpur district-a Behiang leh Sinzawl ah siam a ni.

ILP hi category hrang hrang - temporary, regular, special leh labour hnuaiah pek chhuah a nia, hman ṭan a nih aṭangin permit hi 33,995 pekchhuah a ni tawh. ILP aṭang hian state sorkar chuan January thla aṭang khan cheng vaibelchhe khat a lalut tawh a ni.