AP hydro project scam : AAP leh Congress-te'n Rijiju bang turin phut

Aam Aadmi Party (AAP) leh Congress party-te chuan Union Minister of State for Home Affairs Kiren Rijiju chu Arunachal Pradesh hydro project scam-a inrawlh veah puhin, bang tura an phut thu an sawi.

AAP hruaitu Ashish Khetan chuan, "Rijiju hian hydro project scam-ah hian inhnamhnawihna a nei ngei a, a laina hnai tak hnenah sum ṭhahnem tak a pe a ni. He thil theng hi a pawi takzet a, minister a nihna aṭangin bang turin kan phut a ni" a ti. Khetan chuan, Prime Minister Narendra Modi chu he thilah hian inrawlh tura an phut thu sawiin, a minister zinga mi Rijiju leh a chhungte chu chhui chian an phut thu a sawi. Congress hruaitu Randeep Surjewala pawhin, Rijiju chu minister a nihna chelhzui zel tlak a nih loh thu leh, a nihna aṭanga bang tura an party-in an phut thu a sawi bawk.

Hetih lai hian Kiren Rijiju chuan a laina hnai tak hnena sum ṭhahnem tak a pe anga tarlan chu thudik lo a nih thu leh, mimal intih hmingchhiat tumna a ni, a ti. Rijiju chuan mimal tih hmingchhiat tumna chu a dem takzet tih sawiin, state mipuite tana theihtawp a chhuah thu a sawi. Media-te chuan an thu tarlanah thil hriatsual an nei a ni, a ti. Rijiju-a laina hnai, Arunachal Pradesh-a hydro project thawh meka contractor Goboi Rijiju leh North Eastern Electric Power Corporation (NEEPCO) official eng emaw zat chu eiruah puh an ni. He project hi Arunachal-a hydro-electric project lian ber tur a ni a, tuikhuah pahnih siam mek a ni. Eiruknaa inhnamhnawih zingah hian NEEPCO Chairman leh Managing Editor pawh a tel niin Public Sector Undertakings (PSU) Chief Vigilance Officer chuan a tarlang.

Chanchinbu pakhat chuan Union Minister of State for Home Affairs Kiren Rijiju chu hydro project scam-a inhnamhnawih zingah a tel niin a tarlang a, party hrang hrangte chuan bang tura an phut thu hi an sawi ta a ni.