Manipur-ah bungraw phur truck-te'n beih an tawk

Manipur khawpui Imphal-a National High-way 37-ah silai hmehpuah a ni a, truck driver pahihin hliam an tuar.

Hliam tuarte hi bung-raw phur truck driver an ni a, silai hmetpuaktute hi tute nge an nih hriat a ni lo. Bungraw phur truck leh oil tanker 1,030 vel zet chu Thawhṭanni khan venhimna hnuaiah, Jiribam aṭangin Imphal panpui an ni a, heng truck-te hi mi tu tih hriat lohte chuan Tamenglong district-a Sheijang-ah an lo kap a, driver pakhatin hliam a tuar. Hei bakah hian Tamenglong district-a Awang Khul-ah pawh truck beihna thlengin, he thil thleng hi police leh paramilitary force-te hriattir an ni a, pawikhawihtute zawn hna thawh nghal a ni.

All Manipur Trans-porters and Drivers Union president Anil chuan an mi leh sa ten beih an tawk chu a dem thu sawiin, tun hunah chuan thleng tawh lo se a duh tih a sawi. Driver hliam tuarte chu a tawrhpui takzet tih sawiin, security ṭha zawk pek an phut tih a sawi bawk.

Manipur High Court chuan NH-a lirthei chetvel dan ruahman tur leh, security khauh zawka lekkawh turin state sorkar a lo hriattir tawh a ni. United Naga Council chuan Jiribam leh Sadar Hills-te district-a hlangkai lo tura nawr nana NH dan chah hi November 1 aṭang khan an kalpui ṭan, tun thlengin an la dang chhunzawm a ni. Sorkar laipui chuan NH dan chah chu dan kalh a nih thu leh, UNC-te chu kawngpui an dan mek titawp turin a hriattir tawh a, harsatna chingfel turin central millitary force tirh a remti bawk.