Tripura : Naupang inneih tirna venhimna tur project pali kalpui dawn

Tripura sorkar chuan Social Welfare and Social Education Department hnuaiah,naupang inneih tirna thleng ṭhin venhimna tur leh state puma social welfare service tihchangtlunna tur welfare project pali a kalpui dawn. Social welfare and social education minister Tinku Roy-a'n thuthar lakhawmtute a kawm naah, he hmalakna hi naupang venhimna leh, social development programme zau zawka kalpuina tur a nih thu a sawi.

Minister chuan Anganwadi centre 100 chu English-medium centre-ah thlak a nih thu leh, 562 chu service delivery leh infrastructure thuam chakna turin model centre-ah hlankai an ni tih a sawi. Childcare service tihchakna atan sorkar chuan tribal huam chhungah Anganwadi centre thar 226 a din a, Dharti Aba Janajati Abhiyan project hnuaiah centre 119 hawn a ni tawh tih a sawi bawk.

Roy chuan naupang inneih tirna thleng ṭhin tihtawpna turin sorkarin project pali a kalpui dawn tih sawiin, Chief Minister's Kanya Bivah Yojana hnuaiah hmeichhia kum 18 chin chunglam 45 hnenah sum lama ṭanpuina pek an ni tih a sawi. Hei bakah hmeichhe naupang 105 chu Chief Minister's Balika Samriddhi Yojana hnuaiah puihbawmna pek an ni bawk. Minister chuan pianphunga rualbanlote tan recreation centre chu Rs vbc 5 senga sak a nih tih a tarlang.

Minister chuan National Social Assistance Programme hnuaiah, Rs 2,000 chu mi 1,34,294-te hnenah thla tin pek an ni tih a sawi bawk. State sorkar chuan State Social Assistance Programme leh Chief Minister's Social Assistance Programme hnuaiah social pension scheme 35 a siam tawh bawk a ni, a ti.