Manipur-in fast-track court pahnih hawng dawn

Manipur governor Najma Heptulla chuan state sorkarkin fast-track court pahnih a hawng thar dawn tih a sawi. 

Kar liam ta Zirtawpni aṭang khan Manipur Legisla­tive Assembly budget session neih ṭan a ni a, session ṭan­nia Governor-in thu a sawiah sorkarin state hmasawnna tura a hna thawh hrang hrang leh, a hmalakna turte a sawilang a ni. 

Govenror chuan helpawl hrang hrang aṭangin kawng dik zawh duhin hel 644 chuang sorkar kutah an inpe tawh tih sawiin, heng zinga 574-te chuan sorkarin an puala camp a siamsak pawh kum thum an awm tlin tawh avangin an chhuahsan tawh a ni, a ti. 

Sorkar chuan remna leh muanna hnuaiah state hma­sawnna kalpui zel a duh a, helpawl zawng zawng pawh inremna siampui an nih theih nan, inbiakna neihpui turin a inhawng reng a ni, tiin Governor chuan a sawi. 

"District tinah women police station siam a ni tawh a, hengte hi hman vek an ni tawh a ni," tiin, POCSO leh pawngsual thubuai bikte rang zawka chinfel an nih theihna turin fast-track court pahnih pawh hawn thar a tum a ni, a ti.