Assam : Gohpur-Numaligarh underwater tunnel siam dawn

Assam-a Gohpur-Numaligarh-ah underwater tunnel siam a ni dawn a, he project-ah hian Rs vbc 18,662 sen tur niin zin veivahna thui zawng 85% vela a tihtawi dawn bakah hun hman 95% velin a titlem thei dawn a ni. Twin tube underwater tunnel tur niin km 33.7 vela thui a ni ang.

Union Cabinet chuan project hi a pawm tawh a, Detailed Project Report butsaih mek a ni. Tunnel-ah hian tube pahnih a awm dawn a, tube pakhat zawk hian railway infrastructure a nei dawn nia sawi a ni. Tun dinhmunah Gohpur leh Numaligarh inkar hi km 240-a thui niin, zin veivah hun chhung hi darkar ruk vel a ni. Tunnel hi peihfel a nih hunah chuan km 34-in kawng thui zawng a tlahniam dawn a, darkar ruk ṭangin minute 20-ah a tlahniam thei dawn bawk.

Project hi ram chhunga rail-cum-road tunnel hmasa ber tur niin, khawvela a pahnihna tur a ni bawk. Tunnel hi Assam chauh ni lo hmarchhak bial state dangte tan pawha hman ṭangkai theih tur a ni. He hmalakna hian bungraw phurh chhuah kawngah a pui dawn a, senso a titlem dawn bawk. Tunnel hi hmarchhak biala inkalpawhna kawngah hmasawnna lian tak thlenin, hmarchhak biala mamawh phuhruk kawngah a puih dawn bakah, chenna leilung leh a chhehvel vawnhimna kawngah pawh a pawimawh dawn hle nia sawi a ni.