Venhimna tihchakna atan COBRA dah an ni : Manipur Home Minister

Manipur home minister Govindas Konthoujam chuan June 11 khan tun hnaia CRPF-a Commando Battalion for Resolute Action (COBRA) unit pahnih dah chuan state-a dan leh thupek dinhmun siamṭhat kawngah a pui dawn tih a sawi. COBRA unit-te hi Central Reserve Police Force hnuaia din a ni a, guerrilla warfare leh jungle combat operation-a training nei an ni.

Naga mi paruk rukbote ruang mitthi dahna hmuna dah mek chhungte nen inbiakna an neih zawha Jawaharlal Nehru Institute of Medical Sciences-a thuthar lakhawmtute a kawmnaah, Konthoujam chuan state-ah security force an tam tawk loh thu leh, COBRA battalion dah belh chuan venhimna a tihchak phah dawn thu a sawi. Home Minister chuan remna leh muanna tluantling siamna atan mipui thawhpuina ṭha a pawimawh thu a sawi bawk.

State sorkar chuan tlang leh valley-a cheng mipuite chu buaina chhuak ṭhin tihtawp a nih theihna turin thawh hona ṭha neih an ngen fo thu sawiin, security force tam zawk dah ni mah se, mipui thawhpuina tel lo chuan hmalak a harsa hle a ni, a ti. Konthoujam chuan Naga mi paruk thah an ni chu pawi a tih thu leh, pawikhawihtute zawn chhuah a dan anga hremna na tak pek an ni dawn tih a sawi bawk. Naga ralthuam keng pawlin Kuki mi 14 an hrente an chhuah zalen avangin lawmthu a sawi a, Naga mi paruk zawn kawnga state police-te inpekna a fak bawk.