Manipur : Imphal International Airport-in hma a sawn

Manipur-a Imphal International Airport-ah kum eng emaw zat liam ta aṭang khan thlawhtheihna service leh passenger traffic-ah nasa takin hma a sawn. Hei hi kum 2023 May 3 aṭanga hnam leh hnam inkara buaina a chhuah hnua Manipur-a National Highway-ahte lirthei tlan khap a nih vang niin an sawi.

Thlawhtheihna chuan man tih san a nih karah, airport-ah hian nitin thlawhtheihna thlawk chhuak leh thlawk lut 16 chuang a buaipui tawh a, nitin passenger 3,000 vel an awm a ni. He hmasawnna avang hian Imphal chu Guwahati dawta hmarchhak biala airport hman tam ber a ni. Helai bial airport tlemte zinga radar surveillance hmanga thuam a ni bawk. Airport-ah passenger an pun zel avangin, New Integrated Terminal Building (NITB) pawh sak mek a ni a, he terminal hi sq metre 22,000 vel niin, 50% zawh fel tawh a ni.

He facility hi GRIHA 5-Star Green Building standard anga sak niin, aerobridge pali, domestic leh international arrival and departure zone hrang hrang, Manipur culture heritage pholan theihna tur architecture-te a awm dawn a ni. Motor 1,000 vel leh bus 15 dahna tur parking space siam a ni bawk ang. State additional chief secretary (Transport & TCI) Anurag Bajpai chuan project hi kumin December 31-a peihfel hman tur a nih thu a sawi. Airport-ah hian passenger huang zauh bakah, cargo leh commercial infrastructure pawh thuam chak a ni bawk.