Nagaland : World Day Against Child Labour hmang

Nagaland-a district hrang hrangah June 12 khan World Day Against Child Labour hman a ni a, thupui atan "Red card to child labour: Fair play for children, decent work for adults" tih hmangin programme buatsaih a ni. Tseminyu-ah chuan District Child Protection Unit (DCPU) chuan 3Shelf Project an thawhpuinain DCPU office-ah hun an hmang.

He huna thu a sawiah, Tseminyu deputy commissioner, Japheth Woch chuan naupang hma hun eng zawk siamna atan zirna a pawimawh thu leh, naupang zawng zawng lehkha zir theihna, an ṭhanlenna leh an theihna tipuitling tura hun remchang siamsak an phu tih a sawi. Woch hian 3Shelf Project an thawhpuinaa an din, DCPU Tseminyu Reading Corner a hawng bawk a, helai hmun hi lehkhabu tam tak chhiar theihna tur leh, naupang leh ṭhalaiten ziak leh chhiar lama an tui theihna tura din a ni.

3Shelf Project kal chhoh dan chungchang chu a dintu, Aleno Sale chuan sawilangin, he hmalakna hi mimalin lehkhabu a lakkhawm aṭanga midangin awlsam zawka an chhiar theihna tura buatsaih a nih thu a sawi. He project hi khawtlanga hmun hrang hrangah lehkhabu chhiarna hmun te nau din a ni a, chung zingah chuan park, rehabilitation centre leh creative space-te pawh telin, Tseminyu Reading Corner chu lehkhabu chhiarna hmun pariatna a ni ta a ni.

State khawpui Kohima-ah pawh Kohima District Legal Services Authority (KDLSA) chuan Kohima district-a zirna in parukah NALSA Child-Friendly Legal Services for Children Scheme, 2024 chungchangah legal awareness programme an buatsaih bawk. Session-te hi Chandmari Government High School; Govt High School, New Market; Govt Middle School, Officer's Hill; Govt High School, Midlane; Govt Higher Secondary School, Sechu Zubza leh Chandmari Higher Secondary School-ah te a tawp khar a ni.