Citizenship (Amendment) Bill 2016 Hmarchhak hmun hrang hrangah dodalna lantir a ni

Sawisel hlawh tak Citizenship (Amendment) Bill 2016 chu nimin lamah khan Lok Sabha-ah ngaihtuah tura pharh niin tlai dar ruk dawnah khan pawm a ni. Hmarchhak state hrang hrangah Bill duh lohna lantir nan hian, North East Student's Organisation buatsaihin bandh huaihawt a ni.

State hrang hrangah hian darkar 11 chhung bandh huaihawt niin, zing dar 5 aṭanga tlai dar 4 thleng khan bandh hi huaihawt a ni a, hmarchhak mipui tam tak chuan bandh hi an zawm ṭha hle.

Citizenship Bill hi pawm a nih chuan Muslim ni lo minority community  - Hindu, Sikh, Buddhist, Jain, Parsi leh Kristian - Afghanistan, Bangladesh leh Pakistan aṭanga India ram rawn lut, kum ruk awm tling tawhte chu khua leh tuiah chhiar an ni thei dawn a ni. Heihi ram leilung fate chuan duh loin an hnam chimralna tur niin an ngai thung. Hei mai bakah hian Muslim an tel loh avang hian mi tam tak chuan sakuana kaihhnawih a ni tiin an sawi ve bawk.

Independence hnua a vawikhatna atana hmarchhak pumin inlungrual taka bandh an huaihawt vawikhatna a ni hial.

Assam-ah chuan kum 10 chuang chhunga a vawikhat nan All Assam Students’ Union (AASU) chuan bandh an huaihawt a, BJP thawhpui party-te bakah Congress leh Left party-te chuan Citizenship (Amendment) Bill, 2016 chu an dodal thu sawiin India ram danpui kalh a nih thu an auchhuahpui. Bandh hi pawl 30 velin an thlawp a ni. 

Police-te chuan hmun ṭhenkhatah chuan kawngpui dan nan tyre-te hal a nih thu sawiin - Guwahati, Tinsukia leh Dibrugarh-ah te chuan lirthei-te pawh tichhiat anih thu an sawi. Rel kawng te pawh dan ni bawk mah se rel leh thlawhtheina-te erawh a pangaia an service thu tarlan a ni bawk.

School leh sumdawnna hmunte chu khar niin lirthei tlan hmuh tur a tlem hle a, sorkar hnathawk office kal pawh an tlem hle a ni.

Meghalaya sorkar chuan sorkar hnathawk kal loh tumte chu vau lawk mah se mipuiin bandh hi an thlawp ṭha hle a, hmun ṭhenkhatah chuan tyre-te halin lirthei tichhiatte pawh a awm niin report chuan a tarlang. Garo Hills lamah pawh Bandh hi an thlawp ṭha hle nia tarlang bawkin, lirthei tlan hmuh tur pawh a awm mang lo a ni. 

Hetihlai hian Tura-ah erawh dawr leh zirna inte chu khar ni mah se sorkar office chu ṭha taka hawn niin Deputy Commissioner Ram Singh chuan sorkar hnathawk 80% chuangin office-ah an hming an dah niin a sawi. 

Tripura-ah chuan an Lal chhungkua leh Tripura Congress Working President Pradyot Manikya Debbarma-te chuan AGP in bandh an huaihawt chu an thlawp tih sawiin mipui pawhin bandh hi an thlawp ṭha hle a ni. BJP thawhpui Indigenous People’s Front of Tripura (IPFT)-te pawhin Bill hi an duh loh thu sawiin sut an phut thu an sawi.

Rel leh transport service-te chu pangaiin kaltir ni mah se auto-rickshaw leh mimal lirthei tlan erawh a tlem hle. School tam zawk erawh ni hnih chhung atan khar niin sorkar office-te chu a pangaiin an kal thung.

All Arunachal Pradesh Students’ Union (AAPSU) leh pawl ṭhenkhatte chuan bandh hi an thlawp ṭha hle a, NESO hmalakna chu an thlawp thu sawiin AAPSU general secre­tary Tobom Dai chuan darkar 11 chhung bandh chu ṭha takin an kalpui tih a sawi. 

Nagaland-ah pawh bandh hi an thlawp ṭha hle a, Naga zirlai ṭhenkhat bakah Naga ni lem lote pawhin NESO hmalakna hi an thlawp tih lantir nan bandh-a duty-te hi an pui ve bawk a ni.

Dimapur-ah chuan Dimapur Naga Students’ Union (DNSU)-te chuan bandh hi uluk taka vilin mipuite tlawpna pawh an ngen lawk bawk a, Nagaland hmun hrang hrangah bandh hi kalpuiin Angami Students’ Union (ASU) leh Naga Students’ Federation (NSF)-te pawhin bandh hi an thlawp bawk. 

Joint Committee on Prevention of Illegal Immigrants (JCPI)-te pawhin bandh hi an thlawp a ni.

All Manipur Student’s Union (AMSU) chuan bandh hi ṭha taka an kalpui thu sawiin sorkar laipuiin Citizenship (Amendment) Bill 2016 pawm an tum chu an dodal tih a sawi. AMSU hian Thawhṭanni khan bill copy hi an hal tawh bawk a, NESO chu an thlawp tlat tih an sawi a ni. 

Meghalaya Chief Minister Conrad K. Sangma chuan Citizenship (Amendment) Bill, 2016 chu pawm a nih chuan National People's Party (NPP) chu NDA atangin an inhnukdawk dawn tih a sawi.

Asom Gana Parishad (AGP)-ten BJP te nena an thawhhona an titawp tih an sawi hnuah Conrad Sangma pawh hian Bill hi an thlawp lo tih an sawi ve leh a ni.

NPP chu Bill dodal tu hmasa ber an nih thu sawiin kum liamta Cabinet thutlukna pwhin an lo dodal tawh niin a sawi. An thutlukna siamin sorkar laipuia dona nasa ber zinga mi a nih thu a sawi bawk.

Assam-a Bharatiya Janata Party (BJP) thawhpui Asom Gana Parishad (AGP) chuan Citizenship (Amendment) Bill 2016 vangin BJP nena an thawhdunna an titawp tih an puang.

Assam CM hlui Prafulla Mahanta chuan Citizenship Bill vangin BJP an thawh­puina chu an titawp tih chu a tichiang ta a ni, a ti. 

AGP hian a hma pawhin Citizenship hi an dodal thu an lo sawi tawh a, Bill hi pawm a nih chuan 'Assam Acord' chu awmze awm lo a nih dawn thu an sawi fo tih a sawi bawk.

BJP national president, Amit Shah hnenah AGP president Atul Bora chuan lehkha thawin BJP nena an thawhdunna chu Assam Accord leh thildanga inhriatthiam tawnna a awm vang a nih thu a ziak a ni. Sorkar laipuiin Parliament-a Citizenship (Amendment) Bill 2016 a rawt chuan an inhriatthiamna a tichhia niin a ziak bawk. 

Assam-a pawl eng emaw zat chuan Thawhṭanni khan Citizenship (Amendment) Bill 2016 duh lohna lantir nan ‘Black day’an hmang.

All Assam Students Union (AASU) leh pawl dang 30-te chuan hmun ṭhenkhatah Bill copy hi an hal a, Krishak Mukti Sangram Samiti (KMSS) kaihhruaina hnuaiah pawl hrang hrang 70-te chuan flag dum state chhung hmun hrang hrangah an tar bawk.

Zirlai pawl lian tak pakhat, Asom Jati­yatabadi Yuba Chatra Parishad (AJYCP)-te pawhin state chhung hmun hrang hrangah dodalna an lantir a ni.

AASU adviser Samujjal Bhattacharyya chuan Thawhṭanni khan 'Black Day'-a an hman thu sawiin Citizenship Bill chuan Assam leilung fate chu a nekchep mai ni lo in anmahni ram ngeiah hnam tlem zawkah a siam a ni, a ti.

Samujjal Bhattacharyya chuan Bill chu Assam leilung fate a dodal nia sawiin an theihtawpa an dodal dawn thu a sawi. NESO pawhin January 23 hian Guwahati-ah a huhoa dodalna an lantir dawn thu a sawi bawk.

KMSS leader Akhil Gogoi pawhin BJP chuan Lok Sabha inthlana hnehna channa atan Bill hi pawm ngei tum mah se duh lohna movement an ṭan tawh chu an titawp mai dawn lo tih a sawi.