Meghalaya: Kawng infrastructure thuam chakna tur Rs vbc 3,214 dawng dawn

Meghalaya chuan North East India Infrastructure Summit & Exhibition (NEIINFRA), 2026 neih chhungin Rs vbc 3,214 senna tur project paruk a tlangzarh dawn a, kawng inkalpawhna thuam chak a ni dawn a ni. Ruahmanna an siamah, national highway pali siam tur leh kawng awmsa pahnih thuam ṭhat a ni dawn a, zin veivah leh sumdawnna a tiawlsam dawn a ni. NEIINFRA hi nimin June 15 leh vawiin June 16 hian neih a ni.

Road Transport and Highway union minister, Nitin Gadkari chu summit-ah hian telin, project thawh turte lungphum phum a ni bawk. State chief minister Conrad K. Sangma chuan project-te chu Meghalaya-a infrastructure thuam chakna leh tihchangtlunna tur a nih thu leh, state-a hunrei tak daih ṭhanlenna leh hmasawnna a awm theihna tur a nih thu a sawi. Investment neihna tura ruahmanna an siam zingah Rs vbc 951 senna tur Tura Bypass, Rs vbc 737 senna tur Dhubri-Phulbari Bridge-Selsella corridor, Rs vbc 564 senna tur Pynursla Bypass leh Rs vbc 504 senna tur Selsella-Goeragre Road-te an tel. He hmalakna hnuaiah hian Shillong-Dawki kawng leh Jowai Bypass siam ṭhat pawh a tel.

NEIINFRA-ah hian ramchhung hmun hrang hrang aṭangin policymaker, industry aiawh, financial institution, technology company leh investor-te pawh an tel dawn a ni. Hei bakah Meghalaya, Assam, Manipur, Mizoram, Tripura, Sikkim, Arunanchal Pradesh leh Nagaland Chief Minister-te pawh an tel dawn a, infrastructure ṭhanlen theih dan tur an sawi ho ang. Summit hi Federation of Industry and Commerce of North Eastern Region (FINER), Meghalaya sorkar leh Build India Foundation-te buatsaih a ni.