Manipur: CM-in Kharif 2026 Fertilizer Distribution Programme tlangzarh

Manipur chief minister Yumnam Khemchand Singh chuan nimin Thawhṭanni khan, Kharif 2026 season atana Fertilizer Distribution Programme tlangzarhin, organic fertilizer 'Oorja' tih chu chu bag khata Rs 250 hisapa hralh chhuah turin a vailiam bawk.

He hmalakna state khawpui Imphal-a Directorate of Agriculture-a tlangzarh hmang hian, lei ṭha neih theihna tur, langtlang taka sem chhuah leh state puma loneih kalphung ngelnghet tak a awm theihna turin a pui dawn a ni. Buh chin leh a kaihhnawiha loneitu nuai 3.3 chuangin he programme hmang hian hamṭhatna an neih theih beisei a ni. Organic farming tihmasawn tura sorkar hmalakna kal zelah, state-a distribution center 187 kaltlangin Oorja fertilizer hi hman theih tura duan a ni. Bag khat hi market price-ah Rs 480 niin, loneitute chuan Rs 250-in an lei dawn a ni.

Programme-a thu a sawiah, Chief Minister chuan tun dinhmunah state chuan urea bag nuai hnih vel a neih thu leh, loneitute chu lei ṭha indaih lohna a thleng dawn lo tih a hrilh. Langtlang taka sem chhuah a nih theihna tur leh, thil dik lo thleng tur venna atan sorkar chuan Aadhaar card hmanga finfiahna a kalpui dawn tih a sawi. Lei ṭha hi Aadhaar card, farmer identity card leh hmun ṭhenkhata a mamawh zualte tan sem chhuah a ni dawn tih a sawi bawk.

Chief Minister chuan nikum September thla thleng khan urea hi bag nuai 1.8 vel sem chhuah a ni a, mahse hmun eng emaw zatah indaih lohna nasa tak a thleng tih a sawi. Hemi chungchangah hian Agriculture department official-te chu district hrang hranga sem chhuah dan uluk taka thlithlai turin a chah a, loneitute chu thil dik lo a awm a nih chuan Directorate of Agriculture-ah report turin a ngen bawk a ni.