Meghalaya : Sports Conclave-ah National Games inbuatsaihna ngai pawimawh

Meghalaya Sports Conclave 2026 chu Thawhṭanni khan zawh fel a ni a, he hunah hian infiamna lama inrelbawlna, infiammite tihhmasawn leh kum 2027-a state-in a buatsaih tur, 39th National Games atana inbuatsaihna chungchang sawi hona neih a ni. Conclave hi Sports & Youth Affairs department buatsaih a ni a; ramchhung hmun hrang hrang aṭangin infiammi langsar, sports administrator-te leh policymaker-te an tel.

He hunah hian Meghalaya-a sports infrastructure thuam chakna tura investment ṭhanlenna sawi ho a ni bawk. Project lian tham thawh zingah Rs vbc 132 senna Integrated Multipurpose Indoor Sports Complex, J.N. Sports Complex leh P.A. Sangma Integrated Sports Complex thuam ṭhat, ramchhunga football stadium lian ber tur nia sawi, Rs vbc 732 senna Mawkhanu Football Stadium sak mekte pawh an tel a, he stadium-ah mi 40,000 vel an leng thei dawn a ni.

Conclave-ah hian Olympic medalist Manu Bhaker, P.R. Sreejesh leh Abhinav Bindra-te bakah infiammi Hima Das, Sheetal Devi leh Harvinder Singh-te chuan grassroot development, sports technology, talent hmuh chhuah leh sport ecosystem ngelnghet siam chungchang sawi hona session-ah an tel bawk. Conclave-ah hian infiammite enkawl kawnga sorkar, federation leh institution hrang hrangte thawhho pawimawhzia tarlan a nih bakah, ramchhunga sports ecosystem tihchakna turte sawi ho a ni bawk.