Nagaland : Governor-in Dimapur-Kohima railway project endik

Nagaland governor Nand Kishore Yadav chuan state khawpui, Kohima-a Raj Bhavan-a Northeast Frontier Railway (Construction) official-te nen Dhansiri-Zubza (Dimapur-Kohima) line new-line railway project dinhmun leh Dimapur rel station siamṭhatna tura hmalakna kal mek dinhmun a endik.

Review meeting a kaihhruaiah hian Yadav chuan, infrastructure project thawh mekte a hun taka zawhfel a pawimawh thu leh, state sorkar hnen aṭangin thlawpna leh puihbawmna pek chhunzawm zel a ni dawn tih a sawi. Rel hmanga inkalpawhna chuan economy ṭhanlenna, mipui vantlang veivahna tihchangtlun leh state puma inkalpawhna a thuam chak dawn tih a sawi.

Railway official-te chuan Governor hnenah hian km 78.42-a thui Dimapur-Kohima rel project hnuaiah zawh fel a ni tawh tih an hrilh a, he national project hi Kohima district-a a hmasa ber tur a ni. Project hian Assam-a Karbi Anglong district leh Nagaland-a Chümoukedima leh Kohima district-te a paltlang a ni. He project hnuaia Dhansiri-Shokhuvi leh, Shokhuvi-Molvom section-te chu commission an ni tawh a, hnathawh tur la awmte pawh thawh chhunzawm zel a ni.

Hei bakah Dimapur rel station siamṭhat chungchangah, official-te chuan Governor hnenah hian project site hrang hrangah foundation leh construction hna thawh mek a ni tih an hrilh bawk.