Sikkim: Electoral roll endikna atan enumeration form 100% sem chhuak

Sikkim sorkar chuan electoral roll endikna, Special Intensive Revision (SIR) kalpui mek hnuaiah vote nei theite hnenah Enumeration Form (EF) chu 100% sem chhuah a ni tawh tih chief electoral officer (CEO), Raj Singh Yadav chuan June 17, Nilaini khan a sawi.

State khawpui Gangtok-a thuthar lakhawmtute a kawmnaah, Yadav chuan hun bituk chhungin EF sem chhuah hna zawh fel a nih thu sawiin, elector-te chu hun tiam chhunga form thehlut turin a ngen nghal bawk. Form sem chhuah ringawt chu electoral roll draft-ah telh an nih loh thu leh, voter-te chuan EF tihfel tawh chu June 28 emaw a aia hma emawin anmahni Booth Level Officer (BLO) hnenah theh lut turin a hriattir a ni. Yadav chuan voter zinga hun tiam chhunga form theh lut lote chu electoral roll draft-ah telh an ni dawn loh thu a sawi bawk.

CEO chuan form theh luh a nih hunah BLO-te chuan BLO App hmangin receipt an record dawn a, chumi hnuah document-te chu peih fel a ni dawn tih a sawi. Voter-te chu election official-te thawhpui a, hun ruat chhunga tifel vek turin a ngen a ni. Form sem chhuah zawh a ni ta chu lawmawm a tih rualin, Yadav chuan district eng emaw zata digitization kalpui dan a tlakhniam avangin lungawi thlak loh a tih thu a sawi.