Arunachal leh Assam sorkarin excise inrelbawlna sawi ho

Arunachal Pradesh leh Assam sorkar chuan Nilaini khan ministerial-level meeting neiin; excise inrelbawlna, dan loa sumdawnna venhimna leh revenue mobilisation lama thawh hona tihchak an remti tih official-ten an sawi. Meeting hi Arunachal Pradesh deputy chief minister, Chowna Mein chuan kaihruaiin thawh hona ṭha, technology lama thil thar hmuh chhuah leh inter-state-a insumdawn tawnna ngelnghet neih a pawimawh tih a sawi.

Assam aṭanga meeting-a telte chu Panchayati Raj leh Rural Development, Excise, Border Protection and Development minister Atul Bora bakah state pahniha finance leh excise deapartment official-te an tel bawk. Mein chuan Arunachal Pradesh leh Assam-in hun rei tak chhung thawh hona ṭha an neih tawh thu a sawi. Ṭhenawm state dangte nena thawh hona ṭha neih chuan inrelbawlnaa harsatna awmte a tiziaawm thei a, dan leh thupek kenkawh kawngah a pui thei tih a sawi bawk.

State pahnihte hian excise inrelbawlna thuam chak, dan lo sumdawnna tihtawp bakah enforcement mechanism tihchangtlung bakah, revenue generation huang zauh leh zirna in tam zawk din a pawimawh tih thuchhuahah an tarlang. Deputy Chief Minister chuan excise inrelbawlnaah harsatna a awm avangin state hrang hrangten thawh hona ngelnghet an mamawh thu sawiin, inbiakna mumal leh thawh hona ṭha chuan mipui vantlang hamṭhatna a humhim rualin, rorelna kalphung tihchak kawngah a puih ngei a rin thu a sawi.