Assam : Naupang thla 3 chhung chin hriat loha bo chhanchhuak; doctor 1 an man

Assam-a Cachar police-te chuan hmeichhe naupang thla thum vel chin hriat loha bo tawh chu helai district-a hotel-cum-restaurant an dapnaah midang pahnih nen an chhan chhuak. He thil thleng kaihhnawihah hian doctor nia sawi mi pakhat chu POSCO hnuaiah man a ni bawk. An mi man hi JP Das niin, Thawhlehni khan Udharbond Police Station hnuai, Lathigram-a Parijat Hotel and Restaurant-a zan rei lama beihpui thlaknaah an man a ni.

Police additional superintendent (crime) Rajat Pal leh, police additional superintendent (headquarters) Manas Saikia-ten zan dar 10:30 vela an thu dawn bawhzuiin, he hotel dap beihpui hi an thlak nghal a ni.

Police-te chuan hotel-ah hian eng vanga hruai nge an nih, tihduhdahna an tawh leh tawh loh bakah, hotel neitu emaw, management-ten emaw an hriatpui em tih an chhuizui mek. Hei bakah mihring hralh rukna network nen inzawmna a neih leh neih loh an chhuizui bawk. Police-te chuan Das hi doctor lem chang thubuaiah man a lo nih tawh thu leh, thubuai siamsak a ni tawh tih an tarlang.