Tripura : Khuh damdawi bottle 745 man

Tripura police-te chuan state khawpui, Agartala-a Head Post Office-ah khuh damdawi khap, Eskuf cough syrup bottle 745 an man. Damdawi hi West Agartala Police Station-a thawktuten dan loa postal channel hmanga ruihhlo leh psychotropic substance tawlhruk ṭhin tihtawpna tura beihpui an thlaknaah man a ni.

Thuthar lakhawmtute a kawmnaah, West Agartala Police Station officer-in-charge Rana Chatterjee chuan helai hmun aṭang hian khuh damdawi khap man a nih vawi hnihna a nih thu a sawi. Kar hmasa khan Head Post Office aṭang tho hian Eskuf cough syrup bottle 393 man a lo ni tawh a, Agartala-a College Tilla-a Joyguru Textile-a dah tur Kolkata aṭangin bottle 745 an man leh bawk.

Police-te chuan heng khuh damdawite hi parcel hran pariat aṭanga an man thu leh, postal network hmanga ruihhlo leh a kaihhnawih tawlhrukna tumna nen a inzawm leh zawm loh chhuizuina an nei dawn bawk a ni. Officer pakhat chuan he thila inhnamhnawih man tumin hma an la ṭan tawh tih a sawi. Ruihhlo zuar zawn chhuah leh parcel thawn chhuah bakah a lo dawngtute network hmuh chhuah tumin beihpui thlak nghal a ni tih a tarlang bawk a ni.