Meghalaya : Nirmala Sitharaman-i'n Jowai-Nartiang kawng siam hawng

Union finance minister Nirmala Sitharaman chuan Inrinni khan Meghalaya-a West Jaintia Hills district hmun eng emaw zat thlunzawmna tur, Rs vbc 59 senna a hawng. He kawng thar hian inkalpawhna, sumdawnna leh helai biala service pawimawh pek chhuah kawngah hmasawnna a thlen ngei a beisei thu a sawi.

Jowai-Nartiang-Kdiap-Khanduli (JNKK) kawng hi Development Bank-in Rs vbc 59 a pek hmanga siam a ni a, district-a hmun pawimawhte a thlunzawm bakah, lirthei inkalpawhna siamṭhat leh economy hmasawnna tur remchang siam hmangin tualchhung eizawnna a puih theih beisei a ni. Sitharaman-i'n West Jaintia Hills a tlawhnaah hian sorkar laipui aṭanga Special Assistance to States for Capital Investment (SASCI) scheme hnuaia sports infrastructure project, Wahiajer Football Stadium sak thar a endik bawk.

Stadium hi Rs vbc 65 sengin acre 16-a zauah sak a ni a, helai biala sport facility lian zingah a tel a ni. Stadium-ah hian football field, eight-lane 400-metric synthetic track, 100-metre sprint track leh athletic event hrang hrang; long jump, triple jump, pole vault, steeplechase, javelin throw, shot put leh discus throw tih theihna hmun a awm. Complex-ah hian entu mi 6,000 chuang an awm thei a, football leh athletic-a inelna hrang hrang buatsaih theih a ni ang.