Nagaland : CM health insurance scheme-in chhungkaw 96% vel huam

Nagaland-a Chief Minister's Health Insurance Scheme (CMHIS) chu tun dinhmunah chhungkaw 96% velin an chhawr ṭangkai tawh a, insurance premium sang chho zel karah state sorkar chuan he programme hi kalpui zel turin nasa takin hma a la tih official-te chuan an sawi.

High Court Bar Association (HCBA), Gauhati High Court Kohima Bench leh, Nagaland Health Protection Society (NHPS)-te ṭangkawpin CMHIS chungchanga seminar an buatsaiha thu a sawiah, NHPS joint chief executive officer Dr Kikameren Longkumer chuan, Ayushman Bharat-Pradhan Mantri Jan Arogya hnuaia healthcare-a harsatna awmte tihziaawmna turin kum 2022 aṭang khan kalpui ṭan a nih thu a sawi.

Longkumer chuan PM-JAY hian Nagaland-a chhungkaw nuai 2.59 vel a huam laiin, CMHIS chuan sorkar hnathawk, pension tawhte leh sorkar health scheme awmsa hnuaia chhungkuate hnenah health insurance hamṭhatna a pe tih a sawi. CMHIS hnuaiah hian sorkar hnathawk leh pension tawhte tan kumtin nuai 20 health insurance pek theih an ni tih a tarlang. Longkumer chuan tun dinhmunah sorkar hnathawk leh pension tawh chhungkua 97,185 ten an chhawr mek thu leh, missing middle category chhungkua 20,000 ten an chhawr ṭangkai thu a sawi bawk.

Hamṭhatna dawngtute chuan he scheme hi state chhung leh pawna hman theihna damdawi-in hrang hrangah sum seng loin enkawlna an dawng thei a, state pawna damdawi-in 60 - 70 vel chu he scheme hnuaiah hian dah an ni tawh a, healthcare service ṭha tak pek theihna turin NABH-accredited institution chauh dah an ni.