Kum 2 chhungin Khongsang-Imphal rel kawng siam zawh beisei : Manipur CM

Manipur chief minister Yumnam Khemchand Singh chuan state hmasawnna atan hun rei daih remna leh muanna siam a ṭul thu sawiin, community hrang hrangte chu inbiakna hmanga inremna siam turin a chah bawk. He thu hi Imphal West district thuneituin Chingamathak Ypung Learners' Club, Hao Ground, Changamathak (Pishum Lampak), Imphal-a Jan Kalyan Shivir (Public Welfare Camp) a buatsaihah a sawi a ni.

He huna thu a sawiah, CM Singh chuan he camp hi sorkar hamṭhatna scheme hrang hrang leh, mipui tana rawngbawlna ṭangkai taka hman a nih theihna tura buatsaih a ni, a ti. He hmalakna hi Prime Minister Narendra Modi kaihhruaina hmanga infuih tharna, Viksit Bharat-Viksit Manipur 2047 hmathlirah a tel tih a sawi bawk.

Infrastructure lama hmasawnna pawimawhte tarlangin, Chief Minister chuan rel kawngin Khongsang a thlen tawh thu leh, kum hnih chhungin Imphal a thlen theih beisei a nih thu a sawi. Moreh thlenga rel kawng tihzauh tum a nih thu leh, helai biala inkalpawhna leh economy lamah hmasawnna nasa tak a thlen dawn tih a sawi bawk. Act East Policy kalpui dan sawilangin, Manipur chu Southeast Asia gateway ni turin theihna a neih thu leh, hun lo awm tura ṭhangtharte tan hun remchang siamin, sumdawnna leh thawh hona tichaktu a ni dawn a ni, a ti.

Singh chuan state-ah remna leh muanna tel loin hmasawnna a awm theih loh thu leh, sorkar hmalaknate thlawp turin mipui a chah. Chief Minister chuan Education department-in naupang pahnih ṭanpuina tura sum a pekte hlanin, eitur ṭha leh hrisel eng emaw zat chu TB natna vei mi pali hnenah pek an ni bawk. CM hian state sorkar department hrang hrangin welfare scheme leh public service hmalakna awmte pholanna stall siamte a tlawh bawk.