Meghalaya : Ruahsur nasa avangin harsatna thleng

Meghalaya-ah ruah a sur nasat avangin state khawpui Shillong leh Bangladesh ramri bula khualzin tlawh tamna hmun, Dawki inkar kawngah leimin nasa tak a thlen a, Dawki hi tlawh pawh theih lohin a awm mek.

Pathianni khan state chhung hmun hrang hrangah ruah nasa takin a sur a, East Khasi Hills-a Mawsynram-a IMD station chuan ruahtui tlak tam zawng chu 526.5 mm a ni tih a puang. RKM Sohra-ah 470.4 mm leh Mawkywrat-ah 385 mm ruahtui a tla bawk a ni. IMD chuan ni li chhungin state hmun tam zawkah ruah a la sur chhunzawm dawn tih a tarlang.

Hmun ṭhenkhatah ruahsur nasa vangin tui tling a tam hle a, kawngpui tam takah harsatna a thlen bakah, municipal service pawh hun rei tak a nghawng an rin thu an sawi.

East Khasi Hills Deputy Commissioner chuan Shillong-Dawki kawng chu leimin avangin khar a nih thu leh, hriattirna tihchhuah a nih hma chuan khar chhunzawm a ni dawn tih a sawi. NHIDCL chuan siamṭhat hna thawhna atan ni eng emaw zat a la ngai dawn tih an sawi a, District thuneitu chuan khualzin leh helaia veivakte tan Shillong-Dawki kawng pumpelh a, kawng dang hmang turin a chah a ni.