Tripura : Centre 10-ah NEET (UG) re-exam buatsaih

Tripura-a exam centre hrang hrang 10-ah Pathianni, June 21 khan venhimna khauh tak hnuaiah NEET (UG) 2026 re-exam buatsaih a ni a, centre pakua hi West Tripura district niin pakhat hi Dhalai district a ni. West Tripura district magistrate, Dr. Vishal Kumar chuan exam muanawm taka neih a nih thu a sawi.

District Magistrate chuan thuchhuah siamin, Kendriya Vidyala-a inbuatsaihna kalpui dan a endik thu leh, West Tripura district-a exam centre pakuaah pawh zirlaiten chawhnu dar 1:30-ah exam hall-a an luh thu sawiin, biometric attendance system uluk taka hman a ni, a ti. National Testing Agency (NTA) aiawhte vilna hnuaiah tluang taka exam kalpui a ni tih a sawi. Complaint report a awm loh thu leh, exam centre zawng zawngah venhimna tihchak a ni tih a sawi bawk.

NEET (UG) re-exam hi state puma candidate 4,500 velin an bei a ni. Exam tluang taka neih a nih theihna turin District Magistrate chuan Bharatiya Nagarik Suraksha Sanhita (BNSS) section 163 hnuaiah thupek tichhuakin, exam centre leh a chhehvela punkhawm bakah candidate-te tibuai thei loud speaker hman khap a ni. He thupek hnuaiah hian exam centre aṭanga yard 100-a hlaah admit card dik tak nei zirtirtu, invigilator, leh thuneituin phalna a pekte chauh luh phal an ni. Restricted zone chhungah mi panga emaw a aia tam emaw awm khawm khap a ni.