Manipur CM-in district thar pahnih puang

Manipur Chief Minister Okram Ibobi Singh chuan nimin khan Pherzwal leh Jiribam-te chu district puitlingah hlankai an nih thu a puang.

Pherzwal hi Churachandpur district-a awm ṭhin a ni a, state cabinet meeting chuan district-a hlankai tura a tih zinga mi a ni. Jiribam pawh hi Imphal East district-a sub-division pakhat a ni a, district-ah hlankai a ni ta a ni. CM chuan Manipur chu hnambil ram a ni lo a, state ram a ni, a ti. Chief minister hi Deputy Chief Minister Gaikhangam, MLA Thoudam Debendra Singh leh Revenue Minister Irengbam Hemochandra Singh-te'n an ṭawiawm a ni. District-a hlankai tura cabinetin a pawmte chu ni rei lote chhungin district-ah puan chhunzawm zel an ni thuai dawn a ni.

December 9-a Manipur cabinet meeting chuan district thar pasarih din a lo remti tawh a, chungte chu Jiribam, Kakching, Pherzwal, Noney, Kangpokpi, Tengnoupal leh Kamjong-te an ni. Manipur-ah hian district pakhua - Imphal West, Imphal East, Thoubal, Bishnupur, Senapati, Ukhrul, Churachandpur, Chandel leh Tamenglong te a awm sa a, heng zinga a tam zawk chu tlangram ami te an ni. Manipur ram zau zawng hi sq km 22,327 a ni a, a ram 90% chu tlangram a ni.

Hetih lai hian Cabinet meeting-in district thar din a rem tih thu puan a nih hnuah, United Naga Council (UNC)-te chuan nasa zawkin state sorkar hmalakna dodalin nawrh an huaihawt. Naga pawl hrang hrangte chuan UNC-te hmalakna hi an thlawp thu an puang tawh a, CM Ibobi Singh chu mipuite ṭhendarh tumah an puh. UNC-te hian ni 40 dawn kawngpui an dang chat tawh a, hei vang hian mipuiten harsatna nasa tak an tawk mek a, nunphung a buai phah hle.

Hetih lai hian Naga People’s Organisation (NPO)-te chuan Kangpokpi chu district-a hlangkai tel lo tura an phut thu an lo au chhuahpui ve mek bawk. Kangpokpi chu Naga Territoy huamchhunga mi a nih thu sawiin, state sorkar chu district-a hlangkai tura thutlukna a lo siam tawh sut tura an phut thu NPO-te chuan an sawi.