Manipur-ah Congress MLA-in party chhuahsan leh

Congress MLA Z. Khikhonbou Newmai chuan Nilaini khan a nihna aṭanga a ban thu leh party a chhuahsan thu a puang.

Newmai hian Tamei constituency a bial ṭhin a, MLA a nihna a ṭanga a ban thu a puan leh tak avang hian, kumin chhunga Congress MLA zinga an nihna bansan leh party chhuahsan panga-na chiah a ni. Newmai chuan district thar din tura thutlukna siam chu a dem thu sawiin, hemi chungchangah hian Hill Areas Committee pawmpuina lak a nih loh thu leh, dan kalh a nih thu a sawi. Senior advocate Khaidem Mani pawhin thutlukna siam a nih hmaa Hill Areas Committee hriattir an ni lo chu mak a tih thu a lo sawi tawh bawk.

Newmai chuan a nih-na aṭanga bang tura nawrna nasa tak a tawh thu sawiin, "Min nawrtute chuan thlan tlin leh min tiam a, nawrna a nasat em avangin thutlukna ka siam ta a ni. State Assembly election a hnai tawh a, inbuatsaihna pawh a nasa tawh hle, tunah rih chuan eng party nge ka zawm dawn ka la hre lo" a ti. Bial mipuite chu a ngaih pawimawh ber an nih thu sawiin, an ṭha ber tur ngaihtuahin hma lak tlan zel a ni ang, a ti. Newmai chuan a banna lehkha chu Deputy Secretary hnenah a pek thu sawiin, Congress party a chhuahsan thu chu whatsapp hmanga Manipur Congress president T.N. Haokip a hriattir thu a sawi bawk. Hetih lai hian Haokip chuan Newmai hnen aṭanga banna lehkha an la dawn loh thu a sawi.

Manipur-ah hian Congress party chuan a term thumna hmang mekin, kum 15 dawn ro an rel tawh a ni. Hetih lai hian Assembly-in anti-tribal bill pathum a pass vang te, district chungchangah leh, tribal ten nasa taka sorkar an dodal avangin party chhungah buaina a chhuak. Congress MLA panga chuan an nihna kalsanin party an chhuahsan tawh a, a bikin tribal MLA te chu nasa taka nawr an nih avangin party chhuahsan an awm bawk a ni.