Manipur-a Naga district headquarters pali-ah kawng zawh

Manipur-a Naga district head-quarters pali-ah nimin khan United Naga Council (UNC)-te buatsaihin state sorkar-in district thar pasarih din tura thutlukna a siamduh lohna lantirna kawngzawh huaihawt a ni.

UNC-te chuan Manipur sorkar chuan Naga-te ram an chhuhluih sak mek nia sawiin, district thar din chu an pawm theih loh thu an sawi. Naga pawl hrang hrang, state sorkar leh Ministry of Home Affairs-te'n Memorandums of Understanding (MoUs) an lo ziah tawh chu zah turin sorkar an phut tih an sawi. Kawngzawh huaihawttute chuan Manipur-ah President’s Rule puan an phut thu an au chhuahpui a, Governor hnenah memorundum an thehlut bawk. Liangmai Naga Council, Manipur (LNC-M) pawhin district thar din chu an remtih loh thu an sawi. LNC-M-te hian Manipur Chief Minister O Ibobi Singh hnenah memeorundum thehlutin, sorkar hmalakna titawp tura an phut thu an thlen.