Manipur-a inlambunna Tumhnih thlengah police pahnih thi

Manipur-a Chandel district-ah nimin khan inlambunna ṭumhnih a thleng a, Manipur police pahnih an thih bakah hliam tuar eng emaw zat an awm.

Inlambunna hi Lokchao khuaah leh Bongyang area-ah te thlengin, mi pahnih an thih bakah hliam tuar mi 16 an awm a ni. Manipur Police-te hi Moreh aṭanga Tengnoupal District pana an tlan laiin Lokchao-ah lambun an ni a, Chief Minister Okram Ibobi Singh-a hnung zuia kal an ni. Thi te hi Md Ayub Khan leh Hc Ngarei Marring-te an ni a, he thil thleng hi National Security Council of Nagaland Isak-Muivah(NSCN-IM)-te tih a nih an rin thu police-te chuan an sawi. Hetih lai hian Chandel district-a Bongyang area-ah pawh inlambunna hi thlengin, security force mi pariatin hliam an tuar. Hliam tuar zinga mi pathum te chu an dinhmun a ṭha lo hle nia tarlan a ni a, Imphal panpui nghal an ni.