Vawiinah NESO leh AASU ten bandh huaihawt dawn

Hmarchhaka zirlai pawl lian tak North East Student's Union (NESO) leh All Assam Student's Union(AASU)-te chuan Citizenship (Amend­ment) Bill 2016 duh lohna lantir nan vawiin hian hmar­chhak hmun hrang hrangah bandh an huaihawt dawn.

Zirtawpni liamta khan Silchar-a Barak Valley-a thu a sawinaah Prime Minister Narendra Modi chuan Citizen­ship (Amendment) Bill 2016 chu Parliament-ah pawm thuai a nih dawn thu a sawi a, hei hi hmarchhak zirlai pawl hrang hrangte chuan an duh lo hle a ni. 

NESO leh AASU chief advisor Samujjal Kumar Bhatta­charyya chuan darkar 11 chhung bandh hi an huaihawt dawn tih sawiin, PM thusawi duh lohna hi an lantir dawn tih a sawi a, pawl dang 30 in an thlawp dawn tih a sawi bawk.

Bhattacharyya chuan ethnic communitu 30-te nen meeting an neih hnuah thutlukna hi an siam tih sawiin PM thusawi chu an helh hle tih a sawi a, zing dar 5 aṭanga tlai dar 4 thleng bandh hi huaihawt a nih tur thu a sawi a ni.

Hetihlai hian ruahman sa tawh exam awmte, All Bodo Students Union, Gorkha cultural meet, Kesab Mahanta National Theatre Festival  leh thildang ruahman sate erawh chu bandh hian a huam dawn lo tih a sawi bawk.

ASSU president Dipanka Nath chuan PM chuan democra­cy a zah lo hle nia sawiin, demo­cracy dan kalhin bill kalpui a tum niin a sawi. Ram leilung fate zahna a nei lo niin a sawi bawk.

Bharatiya Janata Party chu mipuite duhdan kalha hmalaah a puh a, Assam mipuite chuan inthlan awm leh hunah a chhanletna an pe dawn a ni, a ti. 

Samujjal Kumar Bha­ttacharyya chuan Bandh huaihawt chu thil nuam tak anih loh thu sawiin, mipui nunphung tibuai thei a nih avangin thutlukna harsa tak a nih thu a sawi. Mahse demo­cracy kalphung pangai taka an dodalnate chu ngaihthlak anih tak loh avangin duhthlan tur dang an nei ta lo niin a sawi a ni. October 2008-a bomb puak vanga bandh an huaihawt kha bandh an huaihawt hnuhnung ber chu a nih thu a sawi bawk a ni.