Shiv Sena in Citizenship Amendment Bill dodal dawn

Assam-a BJP thawhpui Shiv Sena chuan Pathianni khan Parliament-ah Citizenship Amendment Bill an dodal dawn tih an sawi.

Shive Sena party hruaitu Sanjay Raut chuan  Asom Gana Parishad ten bill hi dodal tura an ngenna chu an pawm tih sawiin, Parliament-ah pawh Citizenship Amendment Bill 2016 hi an dodal dawn tih a sawi a ni.

Raut chuan Assam mipui, hnam hrang hrang, sakhaw hrang hrang leh caste hrang hrangte chuan bill hi an dodal a ni, a ti bawk.

Citizenship Amendment Bill 2016 hi pawm a nih chuan Afghanistan, Bangladesh leh Pakistan aṭanga dan loa India rama rawn lut, kum ruk awm tling tawhte chuan khua leh tui nihna an nei dawn a ni.

Joint Parliamentary Commi­ttee chuan bill hi enfiahin nimin khan Parliamnet-ah pharh turin an ruahman tawh hial a, hemi a nih avang hian NESO pawhin JPC hi phartsantu anga an ngaih thu an lo sawi tawh bawk. 

Shiv Sena chuan he dan Parliament-a pharha awm tawh hian Assam Accord hnuaia cultural, social leh linguistic identity humhimna chu a tichhe vek dawn niin an sawi. Hemi bakah hian Supreme Court kaihhruaina hnuaia kalpui mek National Register of Citizens pawhin awmzia a nei dawn lo niin an sawi bawk.

BJP leh Shiv Sena inkarah hian khi a awm nasa hle nia sawi a ni a, tuna Shiv Sena ten Citizenship Bill an dodal tur thu an sawi pawh hian an inkara khi awm nasat zia a tilang chiang hle nia ngaih a ni. Kum li kalta chhung khan thawkdun mah se Lok Sabha inthlan a hnai telh telh a, an inkar boruak a ṭha lo chho telh telh nia sawi a ni.