Hmarchhak state pali ten Clinical Establishment Act pawm

India rama healthcare service tihchangtlunna tura duan, Clinical Establishment Act chu state 11 leh Delhi tih loh Union Territory zawng zawngin an pawm. Heng state zingah hian hmarchhak state pawh pali an tel a ni.

He Act hi sorkar laipuia central Health Ministry chuan state hrang hrangte chu pawm turin nasa takin ngen mah se pawmtu an la tam lo hle. 

Minister of State for Health, Anupriya Patel chuan Sikkim, Mizoram, Arunachal Pradesh leh Assam bakah, Himachal Pradesh, Uttar Pradesh, Bihar, Jharkhand, Rajasthan, Uttarakhand, leh Haryana bakah Delhi tih loh Union Territory zawng zawng chuan an pawm thu a sawi a ni.

Anupriya Patel chuan state dangte pawhin ram danpui Article 252 hnuaiah an la pawm vek a ngai dawn tih a sawi a, state hrang hrangin an pawm hunah chiah Act hnuaia provision-te hi a hman theih dawn tih a sawi bawk.

Clinical Establishments Act hi sorkar laipui dan siam a ni a, clinical organisation zawng zawng registration leh regulation siamna tur niin service leh standard mumal tak siamna tura tih a ni.