Arunachal: Residential quarters 15 chuang tuilianin tichhia

Arunachal Pradesh-a Keyi Panyor district-a Yazali circle-a NEEPCO project bul, Poosa huam chhunga residential quarters 15 chuang chu ruah a sur nasat avangin tuilianin a tichhia tih official-te chuan nimin Nilaini khan an sawi. Tuilian hi June 23 leh 24-a thleng niin, NEEPCO project site leh a chhehvel a nghawng a ni.

State Disaster Management Department-in Keyi Panyor district commissioner thuchhuah chuan tuilian hian project thawh mek zinga retaining wall a tihchhiat thu leh, hei hian NEEPCO project bula residential quarters-te a nghawng niin an tarlang. Official-te chuan hmeichhe pakhat awmna chin hriat a ni lo tih an sawi bawk.

State Disaster Response Force (SDRF) te puihnain chhan chhuah leh chhawmdawl hna thawh ṭan a ni tawh a, National Disaster Response Force (NDRF) pawh inralring reng tura tih niin, chhan chhuah hna pui turin district hi an pan bawk a ni. Thuneitute chuan Yazali huam chhunga lirthei hman theih awm zawng zawng chu chhan chhuah hna thawhna atan dah a nih thu leh, helai hmuna ex-servicemen-te pawh chhanchhuah leh chhawmdawl hna thawk turin an che chhuak tih an sawi.

He chhiatna thleng kaihhnawihah hian NEEPCO chuan an powerhouse an shutdown lailawk a, tuikhuah aṭanga tui luan chhuah dan an endik a ni. Ruahsur nasa in leimin a thlen avangin hmun thumah kawng kal tlang theih lohin a ping mek a, Potin leh Hoj bula National Highway-ah mi eng emaw zat an tangkhang bawk a ni.