Meghalaya : CM-in traffic tawt tihziaawmna tura ruahmanna thlir let

Meghalaya chief minister Conrad K. Sangma chuan Indian Army, NHIDCL, PWD leh district administration official aiawhte nen high-level meeting neiin, state khawpui Shillong-a Rilbong-Anjalee-Barik Point corridor-a traffic tawt tihziaawm a nih theih dan tur an sawi ho.

Meeting-ah hian lirthei tlan dan tihchangtlunna tura rawtna hrang hrang awmte thlir let a ni a, chung zingah chuan kawng zau zawk siam, junction tihchangtlun, lirthei tlan enkawl dan tur leh, hun rei tak daih infrastructure tihhmasawnna turin ruahmanna hrang hrang siam a ni. Chief Minister chuan sorkarin traffic tawt avanga harsatna awmte sutkianna atan a rang lama hmalak a tum thu leh, state-ah lirthei a tam zel avangin hun rei tak daih tura ruahmanna siam a tum thu a sawi bawk.

Nakkum February aṭanga March thla thlenga neih tur National Games chungchang pawh sawilangin, Sangma chuan inkalpawhna kawngpui thuam ṭhat bakah, state mipui, state tlawhtute leh inelnaa telten veivahnaa harsatna an tawh lohna turin hmalak a pawimawh thu a sawi. Shillong-a traffic kaihhnawiha harsatna an tawh chungchanga Indian Army-te leh stakeholder dangten thlawpna leh thawhpuina ṭha an pek avangin lawmthu a sawi.