Hill district-ah security force dah belh a ni : Manipur Home Minister

Manipur home minister Govindas Konthoujam chuan Thawhlehni khan, state-a hill district-ah venhimna chak zawka kalpui a nih theihna turin security force dah belh an ni tih sawiin, ralthuam leh a kaihhnawih tihtlemna turin hmalakna kalpui a ni bawk. Konthoujam chuan valley district-ah boruakin ziaawm lam a pan thu leh, hill district-a beihpui thlak ngaih pawimawh a ni tih a sawi.

Valley district-ah buaina lian tham ni lo chhuak awm mah se, hill district-ah nasa zawkin buaina a chhuak leh mek tih a tarlang. Hemi chungchangah hian boruak muanawm a awm theihna turin security force-te chu hill district-ah hian dah belh an nih thu a sawi bawk. Konthoujam chuan security force dah thar zingah hian CRPF-a CoBRA unit pawh telin, pawikhawihna thlentute man chhuah kawnga hma an lak dawn bakah, ralthuam tihtlemna turin beihpui an thlak nghal a ni, a ti.

State-ah remna leh muanna a awm chu a duh ber a ni tih tarlangin, tun hnaia NIA-in ralthuam ruk thubuaia Arambai Tenggol member pathum an man chungchangah state sorkar leh DGP-ten inbiakna an nei tih Home Minister chuan a sawi bawk. DGP nen inbiakna an neih hnuah man belh an la nei lo. Security force-ten beihpui thlak mah se, valley huam chhungah dan loa ralthuam inthawn kual ṭhin an la awm tih a sawi a ni.