Lungalhthei khur bulah ruang pahnih chhar

Meghalaya-a East Jaintia Hills-a lungalhthei khura tang mi 15-te chhan­chhuah hna chu thawh mek ni mah se thu lawmawm lam hriat tur a awm thei meuh lo.

Hetih rual hian he thil thleng kaihhnawihah hian Meghlaya Police-te chuan Pathianni khan ruang pahnih an chhar thung a, pakhat zawk hi East Jaintia Hills-a Mooknor Jalyiah thingtlang khaw mi, Elad Bareh (26) niin, January 4 aṭang khan chin hriat lohin a awm nia report a ni.

Elad hi a patea'n January 4-a FIR a thehluh hnu aṭangin police-te chuan an zawng nghal a, Pathianni khan coal quarry-ah chhar a ni a, an bul vel an enfiahna lamah Deinchynrum thingtlang khaw mi, Monoj Basuma­try-a ruang chu hmuh a ni leh bawk.

Police-te chuan lung­alhthei an laichhuak tur chu lungin a delhhlum nia an rin thu sawiin, ruangte hi post mortem turin SDM & HO Khliehriat CHC-ah thawn an nih thu a sawi. 

Meghalaya police-te hian dan loa lungalhthei la ṭhinte an dapnaah Khliehriat Police Station officer-in-charge Sub Inspector W.  Nongtdu leh Sub Inspector P. R. Marak bakah an kaihhruai team-te chuan Pathianni vek khan Sankilo Umlawang khaw kawngah mi pakhat, dan loa lungalhthei la lai an man.

Hemi hnu hian beihpui thlak chhunzawm zelin San kilo area-ah midang pathum an man leh bawk a ni. Inrinni khan beihpui an thlak naah mi pali an man bawk.