Helhoin an ambush naah Manipur police pathum an thi

Manipur Police pathum chu Ningani khan hmun hnihah helhoin an ambush a, police pathum an thih bakah mi dang pakua-in hliam na tak an tuar.

Police ambush tute hi hriat an la ni lo a, eng pawl mahin an tih niin an la chhal lo.

Hliam tuar zinga ṭhenkhat hi an dinhmun a ṭha lo hle a, thi zat hi an la pun chhoh mai theih thu hospital lam chuan an sawi.

Police-te hi Moreh leh Thou-bal station amite niin, Chief Minister Okram Ibobi Singh-an district thar, Tengoupal a hawnna tura duty tura tirh an ni.

Helho hian Ningani zing dar 6.30 vel khan Myanram ramri bul, Lokchao-ah Moreh aṭanga kal police-te chuanna motor hi an bei a, Head Constable Ayub Khan leh L.Maring an kaphlum a, hliam tuar an awm bawk.

Ambush ṭum hnihna hi Bongyang-a thleng a ni a, Thoubal police team te motor beih niin, polie pakhat a thi. Hliam tuarte hi damdawi-in lam panpui nghal a ni.

CM Singh chuan helho an ambushnaa police thi chhungte a tuarpui thu leh, cheng nuai nga ṭheuh pek an nih tur thu a sawi. Pawikhawihte chu zawnchhuah a, an phu ang hremna pek an nih ngei tur thu a sawi bawk.