Arunachal Congress-te'n MoS ban turin PM Modi an phut

Arunachal Pradesh Congress chuan thu-chhuah siamin, Union Minister of State for Home Affairs Kiren Rijiju chu Arunachal power scam-a a inrawlh avangin, Prime Minister Naren-dra Modi hnenah minister a nihna aṭanga ban turin an phut tih an sawi.

NEEPCO chief vigilance officer Satish Verma chuan tun hnai khan Arunachal West Parliamentary consti-tuency-a, 600-MW Kameng Hydro-Electric project report a tichhuak a, eirukna lian tak awmah MoS Rijiju chu inhnamhnawih leh, a laina hnai contractor Goboi Rijiju hnena duhsakna uchuak tak lantirah puh a ni. He thil thleng hian sawi zui a hlawh hle a, MoS chuan mimal intihhmingchhiat tumna mai a nih thu a sawi a, Arunchal mipuiten an ngenna avanga he thilah hian inhnamhnawih mai a nih thu leh, mipuite ngenna avanga hmalakpui a nih thu a sawi.

AP chief minister hlui Nabam Tuki chuan he thil thleng hi an party chuan an dem takzet a, inhnamhnawihte chungah hremna na tak pek ngei an phut tih a sawi. Eirukna chu hmasawnna kawng daltu lian tak a nih avangin pawmzam mai chi a ni lo a, mawhphurtute chu an nihna aṭangin bang ngam rawh se, a ti. Lok Sabha Member hlui leh Congress hruaitu hlun Takam Sanjoy pawhin Rijiju chu a nihna aṭanga bang ngam tura a duh thu sawiin, he thilah hian a laina hnai tak nen hian thil dik lo an ti ngei a ni, a ti. Hemi chungchang hi Union Power Minister Piyush Goel leh CVO-te pawh a sawipui tawh niin a sawi bawk.

Arunachal Pradesh congress-te chuan he thil thleng hi chhuichian ngei an phut a, union home ministry chu CBI chhui tir tura hma la turin an phut.