Gogoi-a hnena NSG security pek titawp dawn

Sorkar laipui chuan Assam Chief Minister hlui Tarun Gogoi-a hnena National Security Guard (NSG) venghimtu pek ṭhin chu a titawp dawn a, CM nilai Sarbananda Sonowal chu NSG security pek a ni tawh thung ang.

Nilaini khan review meeting neih a ni a, hetah hian Gogoi-a hbenna NSC security pek ṭhin tihtawp hi an rel a ni. Gogoi-a hnenah pawh hemi chungchang hi hriattir a ni tawh a, state sor-kar pawh hrilh a ni bawk ang.

Sorkar laipui chuan NSG security chu Assam chief minister ṭanglai tana tih anih thu sawiin, Gogoi chu thuneihna a chan tawh loh avangin tihtawp a ngai tih a sawi a, Assam Police-te chu Gogoi-a venhim hna thawk tur hian ngen an ni tawh thung dawn a ni.

Gogoi chuan Union Home Ministry aṭangin amah veng tura NSG guard dah tihtawp a nih tur thu hi a dawng a, mahse a chhan erawh engmah an sawi lo niin a sawi. DGP leh Addition DGP (Special Branch) te chuan hemi chungchang hi an hriat loh thu a sawi bawk.

Tarun Gogoi chuan NSG security tihtawp sak a nih chhan chu politics thil vang niin a sawi a, Prime Minister Narendra Modi-a kaihhruai sorkar leh Assam-a BJP sorkar a sawisel fo vangin hetiang hian a chungah an ti ta nia a ngaih thu a sawi. CM hlui dang, Prafulla Kumar Mahanta pawh NSG guard-ten an la ven reng thu a sawi.