Meghalaya-ah pawisa puk rulh theih loh vangin intihlum

Meghalaya, South West Garo Hills district-a loneitu pakhat chu a pawisa puk a rulh theih loh avangin a intihlum nia tarlan a ni.

December 8 khan Sindilgre khuaa loneitu Wajning Momi-a (50) chuan chuan an ṭhenawm hnen aṭangin cheng 10,000 a puk a, ni thum chhunga pek a tiam. Mahse bank lamin a pawisa mamawh zat an pekchhuah theih loh avangin Momin-a hi a inawkhlum ta a ni. He thil thleng chungchangah hian Momin-a farnu chuan court-ah zualko a tum thu a sawi. Tarlann dan chuan, Momin-a hian tun hnai khan bank-ah account a hawng a, a pawisa neihte pawh a dah lut a ni. A chhungte chuan bank aṭang hian cheng 20,000 lak chhuah a tum a, bank lam chuan cheng 6,000 chauh an pe chhuak thei a ni.

He thil thleng chungchangah hian Megha-laya Pradesh Youth Congress (MPYC)-te chuan thuchhuah siamin, pawisa indaih lohna avanga thihna thleng chu pawi an tih thu leh, tun hnuah chuan thleng nawn tawh lo se an duh thu an sawi.