Meghalaya : CM-in Lakadong aieng a pholan avangin PM chungah lawmthu sawi

Meghalaya chief minister Conrad K. Sangma chuan tun hnaia France rama G7 Summit neihah prime minister Narendra Modi-a'n an state thar chhuah leh an ngaihhlut tak, Lakadong aieng a pholan avangin lawmthu a sawi a, hei hi Meghalaya-a lo neih hlawhtlinna khawvel huapa puanzarna a nih thu a sawi.

Sangma chuan a social media platform X-ah thuchhuah siamin, khawvel ram hruaitute hmaa state "golden spice" pholan a nih thu leh, loneitute thawhrimna leh theihnate chu khawvel mipui ngaihven a hlawh avangin Prime Minister hnenah hian lawmthu a sawi a ni.

Meghalaya-ah hian loneitute thar chhuah zinga lar ber pawl, Lakadong aieng hi quality danglam tak niin curcumin a tam avangin ngaihven a hlawh chho zel a ni. West Jaintia Hills district-a Lakadong biala chin tam ber aieng hi Geographical Indication (GI) tag a ni bawk. Union minister Jyotiraditya Scindia pawhin he hmasawnna hi lawmawm a tih thu leh, G7 Summit-a Lakadong aieng pholan a ni chuan India hmarchhak bial aṭanga thil thar chhuah khawvelin a ngaihhlut chhoh zel dan a tarlang a, Meghalaya-a lo neih lam sector-in theihna ropui tak a neih thu a sawi bawk.

Lakadong aieng hi ramchhunga aieng ṭha ber pawla ngaih a ni a, curcumin a tam avangin hriselna leh damdawi atan hman a ni. Aieng pangngaiah curcumin hi 2-4% vel a awm laiin, Lakadong aieng ah hian 7-12% vel a awm pha a ni. He thlai hi West Jaintia Hills biala hmeichhe loneituten an chin tam ber a ni a, thingtlang mite eizawnna atana pawimawh tak a ni tawh a ni. A hming pawh hi kum tam tak chhung an lo chin tawhna, West Jaintia Hills-a thingtlang khaw lian lo tak, Lakadong khaw hming an chawitir a ni.