Manipur : CM-in Naga Village Headmen Association hruaitute hmu

Manipur chief minister Yumnam Khemchand Singh chuan June 25 khan Senapati district-a Naga Village Headman Association hruaitute chu State Secretariat-ah hmuin, district-a welfare leh hmasawnna lam kaihhnawih an sawi ho.

Hruaitute hi association president Silas Zho leh secretary Joseph Chache-te'n an ho a ni. Meeting-ah hian palaite hian Senapati district-a hmasawnna a thlen theihna tura an mamawhte leh hamṭhatna chungchang an sawi. Chief Minister chuan district-a harsatna lian tham an tawhte chinfel a ngaih pawimawh thu leh, helai biala mitin huap hmasawnna ngelnghet tak neih theihna tura sorkar inpekna a sawilang bawk.

CM Khemchand chuan Senapati district tihhmasawn chu state pum tihhmasawnna atan a pawimawh tih tarlangin, district-a infrastructure tihchangtlun, public service ṭha pek chhuah leh nitin khawsak chawikanna turin sorkarin hma a la zel dawn tih hruaitute chu a lo hrilh a ni. Hei bakah state sorkarin community hrang hrangah hmasawnna a awm theihna turin theihtawp a chhuah chhunzawm zel a ni, a ti.