Assam: GMCH thuam ṭhatna tur Rs vbc 4,382 puang

Assam chief minister Himanta Biswa Sarma chuan June 27 khan, Gauhati Medical College and Hospital (GMCH) thuam ṭhatna atan Rs vbc 4,382 sen a nih dawn thu leh, state-a premier healthcare institution chu ramchhunga medical campus ṭha ber zinga telh a nih theihna turin tihhmasawn a ni dawn tih a sawi.

He thu hi a social media platform X-ah tarlangin, Chief Minister chuan project atana ruahmanna an siam hmang hian GMCH-ah infasrastructure tihchangtlun, treatment facility huang zauh leh damlo enkawlna service tihchak a ni dawn a ni, a ti. Sarma chuan he hmalakna hi state-a healthcare sector tan rahbi thar a nih thu a sawi bawk.

Chief Minister chuan he project hmang hian healthcare campus chu medical facility changtlung zawkin tihphuisui a ni dawn a, healthcare lam mamawhna a san chhoh zel avangin service tihchak a ni dawn a ni, a ti. Damdawi-in thuam ṭhat chuan GMCH-a phurrit awmte a sukiang thei dawn a, tun dinhmunah he damdawi-inah hian state chhung aṭangin nitin damlo sang tel enkawl niin, hmarchhak bial state dang aṭanga damloten an pan nasa hle bawk a ni. Official-te chuan he project-a insiamṭhatna tur ruahmanna zingah hospital building changkang din, healthcare service huang zauh leh damloten enkawlna ṭha zawk an dawn theihna tura duan a ni, an ti.

GMCH hi kum 1960-a din niin, hmarchhak biala super-speciality hospital lian leh lar ber zinga a ni. Assam-a medical college pahnihna ni bawkin Undergraduate, Postgraduate leh Superspecialty level thleng a zir theih bawk.