CoTU-in Kangpokpi highway hawng turin darkar 48 hun tiam pe

Manipur-a Committee on Tribal Unity (CoTU), Sadar Hills chuan sorkar laipui leh Manipur sorkar chu Kangpokpi district paltlang, National leh Inter-State highway hawng turin Inrinni khan darkar 48 chhung hun an pe. He thutlukna hi civil society organisations (CSOs)-te nen CoTU administrative office-a meeting an neihah an siam a ni.

CoTU chuan helai highway-ah hian thla eng emaw zat chhung zalen taka veivah khap a nih tawh thu leh, Kacha Naga pawlin dan loin checkpoint leh gate-te an siam tih an sawi. An pawl chuan he highway-a veivah khapna chuan nitin mamawh, damdawi leh bungrua thawn kawngah nghawng pawi tak neiin, mipui tan harsatna nasa tak a thlen tih an tarlang. Kawng inkalpawhna chu district tana pawimawh tak a nih thu leh, hman theih loha hun rei tak a awm tawh avangin eizawnna lamah pawh nghawng a nei tawh tih an sawi.

An pawl chuan highway-a zalen taka veivah a nih theihna tura sorkar laipui leh state sorkar hnenah ngenna vawi tam tak an theh luh hnuah pawh ngaihthah a ni, an ti. Dan hriatpuina ni loa checkpoint siamte titawp tur leh, an thil ngen darkar 48 chhunga tihlawhtling turin an thuchhuahah hian an tarlang. CoTU chuan sorkar laipui leh Manipur sorkar chu buaina nasa zawk a thlen hmain a rang lama hma la turin an ngen a ni.